ilmend n umtawa yezdin gar tilizṛi tazayezt n lezzayer akked Usqamu Unnig n Timmuzɣa, a d-tettwasuddes yiwet n tnemselt n usileɣ tuzzigt ara d-yilin s uzwel “ imenzayen n tira n usinaṛyu aslizṛan         s tutlayt n tmaziɣt - s tantala n tmaheq ” ara d-yilin deg temdint n tmenɣast seg 24 ɣer 26 yebrir 2026, s ddaw tnaya n mass lwali        n twilayt n tamenɣast.

Amtawa-ya, ad d-yili ilmend n userṣu d tikci n ufus n tallelt i yilmeẓyen deg wayen yerzan tira n usinaṛyu aslizṛan, ayen ara yefken afud i tmaziɣt iwakken ad d-tban s yakk tantaliwin-ines deg wahil amatu n tilizṛi tazayezt n lezzayer, ladɣa tin n tmaziɣt.

Tanemselt-a, ad d-tili i lfayda n yilmeẓyen yebɣan ad ttekkin  seg twilayin n unẓul ameqqran, iswi-ines d tikci n ufud akked ufus  n tallelt i usnerni n tzemmar-nsen deg usnulfu, iwakken ad sɛun tabɣest i tikci d uslali n yisenfaṛen islizṛanen s tantala tatergit, d ayen ara yefken azal i tukkest tadelsant n temnaḍt-a, akked usebgen   n tbaɣurt-ines tasnilsant seg yimahilen-a ara yesnernin asayes aslizṛan aɣelnaw.

Asegrer n tikli n tnemsal-a, ad d-yili sɣur yimazzagen n sinima d tira  n usinaṛyu, ayen ara yeǧǧen imttekkiyen ad d-awin s lfayda seg tirmitin timsadurin akked usnulfu deg taɣult taslizṛant.

Tigawt-a tella-d d awekked tsudwin-a ɣef usnerni n usileɣ amuzzig, rnu ɣer-s tikli d yilmeẓyen akked usnerni n taɣulin n useqdec n tmaziɣt deg yel talɣa taɣamsant tadelsant, ayen ara yemtawan  d yisrusen iɣelnawen ad snernin tutlayt n tmaziɣt akked usnulfu.