Mahelet yid-nneɣ

Imeskaren

Yal aseggas, deg ahil n Usqamu Unnig n Timmuzɣa, adlis yettaṭaf amḍiq agejdan. Ahil n teẓrigin n Usqamu yettuɛeggen gar yennayer d furar, ɛla ḥsab n yisenfaren d-yettawḍen. Iseggasen-agi ineggura, nnig n yedlisen n tsekla (tamedyazt, tullist, ungal d umezgun), Asqamu yefka azal meqqren i tezrawin d yimawalen acku d tiwsatin-agi i teḥwaǧ ugar tutlayt n tmaziɣt. Ihi, tag-i d tiɣri i yimeskaren, isdawanen d yimnadiyen iwakken ad d-aznen ɣer Usqamu imahilen-nsen deg ayen yerzan tasekla (ladɣa ungal), amawal, tizrawin di yakk iḥricen n tussa. Nnig n waya, asqamu yesuffuɣ-d snat n tesɣunin : Timmuzɣa (s kraḍ n tutlayin) akked Tamaziɣt Tura (s tutlayt tamaziɣt). Iḍrisen-nwen sɛan amkan-nsen deg tisɣunin-agi.

 

Imciwren

Iwakken ad yaweḍ iswi-ines agejdan n tririt nwazal i tutlayt d yidles n tmaziɣt, Asqamu unnig n Timmuzɣa yeldi tiwwura-ines i yimusnawen d yimnadiyen deg uḥric ussnan n tmaziɣt iwakken ad ttekkin deg wahil n tezrawin d yinadiyen d-isebded Usqamu, di yal tintaliwin n tmaziɣt, i tneflit d usmil n timmuzɣa di Lezzayer..

Yal aseggas, Asqamu yeggar-d tiɣri i yimussnawen-agi iwakken ad d-gen tizrawin di kra n yeḥricen yettwafernen yakan sɣur tasqamut tussnant n HCA. D tasqamut-agi ara tt-igezmen di rray ma yella umahil ad yettwasiẓreg neɣ ala.

Tig-i d amedya n kra n tezrawin d-yeffɣen yakan sɣur Asqamu Unnig n Timmuzɣa iseggasen-agi yezrin. Tuget deg-sent ad tent-afem deg temkarḍit tumḍint yella deg usmel n Usqamu.

Tidukliwin

Seg asmi d-ilu, Asqamu yezga ɣer tama n tidukliwin iqeddcen ilment n usmil d usenfali n tilawt n tmaziɣt di Lezzayer, annect-a yella yakan gar tuɣḍaḍ-ines. Ayen d-tefka tsuddut-nneɣ i umussu asduklan, yesɛan isenfaren, yettbini-d deg unnar s tukci tedrimt yal aseggas akked uwelleh deg usemhel d usneḍru n wahil-ines.

Iwakken tidukla ad d-sfaydi s tedrimt n Usqamu, ilaq fell-as ad d-tessers akaram ummid ɣur imeẓla-nneɣ. Akaram ilaq ad yili deg-s :

Araten yellan deg ukaram

  1. Asuter tedrimt n lemɛawna tettwazmel sɣur aselway n tidukla ;
  2. Asɛaned n tesriḥ ;
  3. Asɛaned n uẓayer n tidukla yettwazemlen sɣur anaray n tdukliwin n lwilaya ;
  4. Ahil n tigawt n useggas yettwaqeblen deg ugraw amatu n tidukla ;
  5. Asɛaned n PV yettɛegginen lkumisir n yimiḍanen ;
  6. Aqbal n lmanda sɣur lkumisir n yimiḍanen ;
  7. Tacrawt n yineḍruyen d tedrimt n useggas yezrin yettwaḥbes ɣer 31 duǧember, yettwaqeblen deg ugraw amatu ;
  8. Aneqqis n usenqed n kumisir n yimiḍanen yettwaḥbes ɣer 31 duǧember n useggas yezrin ;
  9. Uṭṭun n umiḍan n lbanka neɣ n tnazzant.

GT : Akaram ilaq ad yili ɣef semus n yisɛanaden.

 

Icriken

Asqamu Unnig n Timmuzɣa iɛewwel ad yezmel aseggas-a aṭas n yimtuwa n umahil akked tisuddutin tussnanin, tisedwalin akked tidelsanin yerzan anadi d usileɣ akked umbaddel n termitin deg uḥric n useddu n yinadiyen d tezrawin ɣef tmaziɣt, akked diɣen s usuddes n yirmad lwaḥi.

Iswiyen n yimtuwa d asizmer n umedhel deg yeḥricen-agi :

  • Asiẓreg n tezrawin timaziɣin ;
  • Aseḍru n tezrawin d yinadiyen yerzan aselmed n tutlayt d yidles n tmaziɣt ;
  • Asewjed n wahilen n uselmed, d yiwfusen d wallalen ididaktiyen ;
  • Asemres n titiknuluǧiyin n yisalan d taywalt i unadu d uselmed ;
  • Ambaddel n termitin d tzemmar deg uḥric n tira ;
  • Tazrawt ɣef useqɛed n tmawalit deg uḥric n tmaziɣt ;
  • Ambaddel n waraten.

 

Français Tamazight العربية