S Lmenddad n mass Mohamed BOUSLIMANI, Aneɣlaf n teywalt, ad d-yelhu Umaray Amatu n Usqamu unnig n Timmuzɣa, Mass Si El Hachemi ASSAD, d Unemhal Amatu n Rradyu taɣelnawt, Mass Mohamed BAGHALI, ass n Aram (tlata) 15 furar 2022 deg tzeqqa Aissa Messaoudi n uxxam n Rradyu, s uciri unṣib n Tɣerɣert tumḍint « Taɣamsa/ ⵜⴰⵖⴰⵎⵙⴰ » yerzan amawal yettwasmersen deg taɣult n tɣamsa d taywalt.

Tiɣerɣert-a tumḍint, d allal s wazal-is ara yefken tagnit i yineɣmasen iwakken ad d-fken timusniwin-nsen deg uswir aseklan akked tnaktiwin, AD tili assaɣ ara yessimlilen akk inaktiyen iɣamsanen s tutlayt n Tmaziɣt s tantaliwin-ines yellan di tmurt-nneɣ. Asenfar-a yusa-d d aseḍru n yiwellihen d-fkan yimettikkiyen deg tannant n usileɣ n yineɣmasen iqeddecen deg rradyuwat timnaḍanin n Rradyu taɣelnawt, d tannant i d-yellan ilmend n teẓrigt tamezwarut n « Lezzayer deg wul » i d-yettwasuddesen seg 05 ɣer 08 Yulyu 2021 deg temdint n Bumerdes.