Ma nemmuqel akka ɣer unnar n tira n tsekla s tmaziɣt, ad naf d akken, tisuffaɣ zgant ttnernayent, simal yettnernay wuṭṭun n yedlisen i d-yettrusun ɣer tnedlisin d tmesriyin. Maca yewwi-d ad nesteqsi: Idlisen-a n tsekla yettwarun s tmaziqṭ, ɣer-sen imeɣriyen s waṭas?

Deg tilawt, imeɣriyen-a llan s tidet deg unnar ma nḥeṣṣen si tama deg usiḍen n yiselmaden n tmaziɣt, n yisdawanen , n wid akk yettmahalen deg unagraw n usedwel d yimeɣriyen meṛṛa yeṭṭafren ayen d-yeffeɣen d adlis amaziɣ beṛṛa i unagraw aɣurbiz naɣ asdawan. Si tama nniḍen, imeɣriyen-a ad ten-naf deg wuṭṭun n yinelmaden d yibalmuden n tmaziɣt yezgan yettnernay.

Maca deg tilewt amek i d-yewwi ad nektazel imeɣriyen? Ad ten-siteg s yigmaḍ d tɣara? Imeɣriyen s tmaziɣt “yellan” neɣ wid “izemren ad ilin” ad ten-af akk di tantaliwin meṛṛa n tmaziɣt? amḍan n yedlisen yeznuz umaru naɣ umsiẓreg deg tnedlisin d temzriyin n udlis yettbeggin-d s tidet amḍan n yimeɣriyen?

Amaru naɣ ameskar s tmaziɣt yettaru ilmend n yimeɣriyen-is d wayen ssaramen? Wissen amaru ma yukez d akken llan imeɣriyen iwumi yezmer ad teɛǧev tira-s?

Amek i d-ttilin imeɣriyen ? s usuffeɣ n yedlisen naɣ s tririt s tira i wayen ttraǧun yemdanen di tɣuri, ahat imir amaru yettusebger ugar ad d-yaru ɣef wayen ḥemlen yemdanen ad teɣren d ullisen d yeḍrisen ? tuttra akken nniḍen : d adlis i d-yeslalayen imeɣriyen naɣ d imeɣriyen i d-yeslalayen adlis ?

Deg useggas n 2018, yettwaxdem yiwen  usastag ɣef tɣuri n yimerzan ɣer SILA, d asastag yexdem yiwen usirra ɣef wazal n 800 n yemdanen ɣer-sen afrinen ibanen : tutlayt i fernen, tasmilt n leɛmer (usemmad), taggayt n udlis (ussnan, aseklan, taẓuri, tasreḍt…atg), talɣa tumḍint n udlis neɣ talɣa n lkaɣeḍ…atg

Ilmend n teẓrigt tis 25 n tmesrit Tagraɣlant n udlis n Lezzayer, tasqamut n SILA tesselɣa-d s yigmaḍ n usastag-nni ɣef wayen smenyifen imeɣriyen, andad-iban d akken “Tasekla tusa-d d tamezwarut iɣef ttnadin imeɣriyen-a, 77,9%, deg-sen ɣqaren s taɛrabt, 59% s tefransit, 22% deg-sen s tanglizit. Ma d tutlayt tamaziɣt ɣaren yis 02.3% n wid yikkan deg usastag-nni. Sebba n waya ahat ad tuɣal ɣer umḍan n yedlisen I d-yeffeɣen imir ur yuggten-a ara, xas ulamma deg yiseggasen-a ineggura simal yettnernay” (amagrad yeffeɣ-d di tnegga tazzayrit n yisalen ass n 21 meɣres 2022).

Mâcha yewwi-d ad nesteqsi ma dɣa d tidet, imeɣriyen s tmaziɣt xuṣṣen, ma nemmuqel ɣer yigmaḍ n usastag-agi imi ur ggten ara idlisen i d-iteffeɣen ? Limer ahat ilaq ad nessihrew uraw n wid ara yikkin deg usastag, anda adlis amaziɣ d yimeɣriyen ad ilin deg usatel ideg d-yufrar udlis amaziɣ deg unnar n yedlisen di Lezzayer : asurif tewwi tmaziɣt seg timawit ɣer tira, azayer n tutlayt, aselmed-ines, d wafrinen nniḍen, d iferdisen meṛṛa i d-yewwi ad ten-nqader iwakken ad neg asastag ɣef yimeɣriyen s tmaziɣt, d asastag ur ilaqen ara ad icabi wid yettwaxedmen ɣef tutlayin iṛṛeṣan deg umezruy.

Si tama nniḍen, yewwi-d asastag ad yeg azal i ugraw n tdukliwin, imeɣnasen d wid iḥemmelen taɣuri, wid ur nekcim ara deg unagraw n tsudwin n usedwel d tesdawiyin. Asisteg n yimeɣriyen yewwi-d ad yeddem afrinen ma yella lemden tamaziɣt neɣ ala, ma tella tmaziɣt, s tantaliwin-is yemwallafen, d tutalyt-nsen tayemmat.

Timlilit-a ad tili daɣen d tagnit i usebgen n wallalen isudwanen i d-yewwi ad fken afud i usnerni n umḍan n yimeɣriyen s tmaziɣt, d allalen ara yezzuzren idlisen d usebɣes n tɣuri s tmaziɣt.

 Yewwi-d daɣen ad yili usebɣes n wahil n usiẓreg n yedlisen s tmaẓiɣt d usissen n wallalen isudwanen yettakken tallelt i suffeɣ n yedlisen s tmaziɣt ; asissen n yimeskaren yettarun s tmaziɣt, ladɣa s usenɛet d usebɣes n wayen uran.

Kra n yigellas a d-yettwasumren i uskasi ilmend n temlilit-a :

Timlilit-a ad tili d tagnit daɣen i tɣuri n kra n yeḍisen iseklanen, s tantaliwin yemxallafen n tmaziɣt.