Taduli tatiliẓrit n yiwen n uḥric seg Usarag agraɣlan s uzwel 

« Masnsen, deg wul n uskay n Uwanek anumidi » i d-yellan di Lexṛub (Qsenṭina), deg ussan n 20-21 seg Cutember, 2014. 

Ayen i yega Masnsen deg unnar asertan d umettan yiweḍ annect n umahil-is aserdasan. Yesdukkel Imaziɣen, yerra-ten d iḥeḍriyen. Yesbedd Awanek anumidi iǧehden deg lqeṛn  wis sin uqbel Sidna Ɛisa,  dɣa yega-yas tirmisin yecban tid n tmura yuẓan di tallit-nni (Qerṭaj d Ruma). Yeslul-d tadrimt  taɣelnawt, yebna tamerriɣt n yiɣerruba, yeslul-d igen( lεeskeṛ) aslugan . Yedder d agellid i iḥemmel s waṭas ugdud-is. Ifukan d lemqamat i yettwabnan ilmend-is qqimen-d d inagan ɣef leqder d ccan i as-iga ugdud-is.

Ɣer yidis n unerni n tfellaḥt,  di tallit-is daɣen tennerna tmusni d tẓuri akked tsekla i yeṭṭfen amkan meqqren di tudert tazayezt. 

 Masnsen yewwi amecwar n urgaz ameqqran n Uwanek, iṛeṣṣa tikli n udabu-ines ɣef uqader n yimtawayen d yibeddi mgal n yibeṛṛaniyen i yebɣan ad d-skecmen iman-nsen deg temsal tidaxliyin n tmurt-is. D netta i d-yeǧǧan awal: « Tafriqt i yifriqiyen», i d-yeskanayen tuṭṭfa-ines deg leεnaya d tmunent  n tmurt.