Aselway n Tsenbert Tamendawant, Mass Omar Belhadj, yemmuger ass-a n AHad 07 mayu 2025, tamagla n Usqamu Unnig n Timmuzɣa, ɣef uqerru-s Amaray Amatu, Mass Si El Hachemi Assad.

Timlilit-a tella-d s usuter n Usqamu Unnig n Timmuzɣa, deg yiswi n umbaddal n tektiwin d tmuɣliwin ɣef temsal yerzan tizemmar n Tsenbert Tamendawant, d taɣulin yerzan snat tsudwin.

Deg tengnit-a, Amaray Amatu n Usqamu Unnig n Timmuzɣa deg umeslay-ines yewwi-d s tewzel ɣef umecwar n usmel n Tmaziɣt di tmurt deg kraḍ mraw iseggasen aya, seld aslali n Usqami Unnig n Timmuzɣa ass n 27 mayu 1995, d temlilt tagejdant yesɛa Usqamu deg yiswi n usdusi n tirni tagansant akked wazal ameqran sɛan yirmad-is ilmend n usnerni n tmaziɣt deg Tesdawit, deg uɣerbaz, deg teywalt d tmetti s umata deg lebɣi n usejhed n wassaɣen n tegmat gartarwa n ugdud akked usnerni n uḥulfu n tikkin ɣer yiwen uɣlan yefkan iẓuran layen deg umezruy.

Seg tama-s, Aselway n Tsenbert tamendawant yumer s wussisen iga Usqamu unnig n Timmuzɣa ilmend n usmel n Timmuzɣa imi d yiwet seg tgejda iɣef tetekka tdukli taɣelnawt, aya almend n wayen iṛṛeṣan deg tmendawt n wunbir 2020, yerna iderrer ɣef tixutert n usdusi n yikataren n umedhel d tmendidt gar snat n tsudwin deg yimal.

Ɣer taggara n temlilit-a, mtawan sin yidisan ɣef tikti n usuddes s umyezdi n yiwet n temlilit ara yeskeyden asmendew n tmaziɣt deg yiwen ukatar aṣiḍfan yemmeden ara yeddun d wayen yersen deg tmendawt tazzayrit.