Asqamu unnig n Timmuzɣa yesfuggul 29 n yiseggasen n usnulfu d tnuflayt
![](https://hcamazighite.dz/docs/media/media/1/original/hhqqvv-7756.jpg)
Asqamu Unnig n Timmuzɣa ad yesfugel ass-a s yiseɣ 29 iseggasen ɣef uslali-ines deg tegnatin ara yeqqimen deg umezruy. Aneḍruy-a d tanagit ɣef wazal n kraḍ n yimerawseggasen n umahil, n ufaris d timerna ilmend n tririt n wazal d usmil n tutlayt d yidles n tmaziɣt di Lezzayer, s tantaliwn-is yemxallafen, di tiddi-ines taɣelnawt. Tasudut-nneɣ yettwasbedden deg useggas n 1995 tessaweḍ ad tili d tansa n usnulfu d tmenyifit n ugerruj n tutlayt d yidles aɣelnaw yezdin izzayriyen akken ma llan.
Seg wass mi ibedd, Asqamu Unnig n Timmuzɣa yefka isurifen imeqranen deg umecwar n tmaziɣt, am usmedew n tmaziɣt d tutlayt taɣelnawt tunṣibt, aseṣeb n umenzu n yennayer, rnu ɣer waya asdusi n usmatu n usemres n tmaziɣt deg yinagrawen n usegmi d uselmed, n usileɣ akked taywalt, yeddan d wussisen nniḍen am usnefli n tɣuri s tmaziɣt d usebɣes n usnulfu d tẓuri s tmaziɣt… yerran d tilawt tiseɣlifin yettunfek i tsudut-nneɣ ilmend n tnaḍt uṭṭun 147-95 n 27 mayyu 1995.
Xas s wayen akk yettwaxedmen, ass-a nuksan d akken aṭas I mazal ad yettwaxdem,ayen nniḍen yewwi-d ad ittuwenneɛ. Deg Usqamu negmen ad nekemmel ad neg ussisen nniḍen, s lǧehd-nneɣ akken ad nsenked imal yeǧǧuǧgen I tutlayt d yidles n tmaziɣt s tiddiyin-is tiɣelnawin tinaṣliyin di Lezzayer.
Asfugel n 29 iseggasen ur yili d amsekti kan, d tagnit i udmu n wallalen yefka uwanek ilmend n usmil d usekrazal n tutlayt d yidl n tmaziɣt. Asgugel-a d tagnit i nekkni daɣen akken ad d-nefk tamuɣli ɣef wayen nessaramn ad t-neg i yimal n tmaziɣt , ad nakez s yiceqqiriwen i t-yettraǧun, ad nessers lsas I yisenfaren imaynuten ara yezdin izzayriyen akken ma llan, imi negza d akken Tamaziɣt, s umezruy-is lqayen, tcudd ɣer temsalt taɣelnawt. Yewwi-d ad d-nesmekti d akken Asqamu Unnig n Timmuzɣa s timad-is d tasudut taɣelnawt, yesdukulen tantaliwin merra n tmaziɣt, ɣer-s tamlilt deg ustan d useḥbiber ɣef tmagit n tmurt.
Assa-a deg Usqamu, ɣur-neɣ lebɣi d ameqran ad neddu ad nkemmel deg ubrid n usnulfu ussnan d usnewelan, ad nesnerni idles d tẓuri, war ma neǧǧa kra seg tgejda iɣef tbedd tsudut ; aseḥbiber n tdukli taɣelnawt n Lezzayer d uqader n yizumal nniḍen n tmurt-nneɣ.