Asqamu Unnig n Timmuzɣa ad yessuddes timlilit taɣelnawt ɣef " takarḍa tasnilsant n tmaziɣt di Lezzayer" deg uxxam n yedles n Adrar, seg 23 ar 25 Tuber 2021. D timlilit yettuɛegnen ad d-teḍru aseggas yezrin, maca tettwadegger s sebba n waṭṭan kuruna.

 Tamsalt n uheggi n tkarḍa tasnilsant n tmaziɣt d asurif s wazal-is deg umecwaṛ n usɣawes ummid, imi takarḍa-ya ad ternu afud i umahil n usudu n tmaziɣt. D tin ara yilin d tiɣerɣert i tsertit tasnilsant ara yebnun ɣef talɣut tussnant.

Ihi, aseḍru n tkarḍa tasnilsant n tmaziɣt tusdidt s uttikki n yimsaduren d yimuzzag deg taɣult n tezrawin timaziɣin ad tessunefk asili n testratijit iwatan i usnefli d usekrazal n tutlayt tamaziɣt di Lezzayer d tmazɣa akked Tefriqt s umata.

 Deg wahil n temlilit-a ihi, 26 n yisaragen ara d-yawin awal ɣef semmus (5) n yisental :

 1-Tilawt n tuggti tutlayant die Lezzayer d yimal n tegmi tussnant takadimit.

 2-Takarḍa n tutlayin di Lezzayer: asumuɣ, taddadadin d usmagi n tantaliwin n tmaziɣt di Lezzayer.

 3-Aṭlas asnilsan n tantaliwin n tmaziɣt yettwasmersen di Lezzayer.

 4-Assinew antalan n timawit tamaziɣt di Lezzayer.

 5-Tasertit n tutlayin di Lezzayer deg yeḍrisen isuḍafen d wussisen n uwanek ilmend n usekrazal i yiferdisen utlayanen n tmagit tazzayrit.