Arraz n uselway n Tegduda n tsekla akked tutlayt tamaziɣt: ttunefken warrazen i wid i d-yufraren
LEZZAYER TAMANEƔT – Aneɣlaf Amenzu, Mass Nadir Larbaoui s yisem-is d agensas n uselway n tegduda, Mass Abdelmadjid Tebboune, yesselwi, ass n umhad (lexmis) deg Usammas agraɣlan n yisaragen Abdelatif-Rahal deg Lezzayer tamaneɣt, tafugla n tikci n Warraz n uselway n Tegduda n tsekla akked tutlayt tamaziɣt deg teẓrigt-is tis 4.
Yessuddes-it useqqamu Unnig n timmuzɣa, ddaw leɛnaya n uselway n Tegduda, ilmend n yirmuden n Useggas Amaynu amaziɣ 2974, teḍra-d tfugla n teẓrigt tis 4 n Warraz s tihawt n yimaslaḍen n Unabaḍ, n usemtar n uselway n Tegduda yettwakelfen s tuddsiwin tirnabaḍin akked yizerfan n Umdan, Mass Hamid Lounaouci, igensasen n tuddsiwin yemgarden, tisuda akked yiduba idiganen akked tɣellisanin.
Ilmend n waya, arraz amezwaru deg taggayt n « Tsekla n Tenfalit Tamaziɣt d Tsuqqilt ɣer Tmaziɣt » yettunefk i Alaeddine Tafssast (seg Tbatent) yernu yenna-d umeskar-a dakken arraz-a d « tasentayt ifazen sɣur uselway n tegduda i usebɣes n tisseɣnewt s tutlayt-a yellan d azamul n tmagit aɣelnawt yernu d tin iḥerzen takatut d tgemmi tadelsant taɣelnawt », am wakken i d-yerna dakken ungal-nnes yewwin arraz d win d-yessawalen ɣef tuṭṭfa deg wazalen d yimenzayen deg tmeddurt yeččuṛen d icqirrwen.
Tamnadit Aicha Hadrani (Tabatent) tewwi arraz wis sin deg taggayt n « Tesnilest » ɣef usegzawal-nnes n tcawit (tamnaḍt n Tkukt) yernu txebber-d dakken tummar imi i tewwi arraz-a, yernu aya ad tt-yessebɣes akken ad tkemmel anadi-nnes deg tgemmi tadelsant tarangant, tasekla tamaziɣt d tmezzugin titwilanin d tussnanin niḍen yeqqnen ɣer waya.
Seg yidis-nnes, Fadia Tidjet (Bgayet) yewwin arraz amezwaru deg « tegmiwin ɣef tgemmi tadelsant tarangant tamaziɣt » deg wayen yerzan « insayen yerzan takziziwit d uɣraf n tamemt deg Tmurt n Leqbayel » tenna-d dakken tummar s warraz-a yernu tesnemmer imsuddsen n tedyant-a.
Myal n warraz wis sin deg taggayt-a, taneɣmasty Hamida Chouchane (Tabatent) tewwi arraz-nnes ɣef tezrawt i d-tga ɣef turarin tiɣerfanin deg Uwras, yernu tenna-d dakken arraz-a d agafud akken ad ternu ad teg ugar n tegmiwin yerzan insayen yernu ad tedrew deg uḥraz-nsen.
Aselmad n tmaziɣt Tarek Iftene (Tizi Uzzu) yewwi arraz wis kraḍ deg taggayt n « tegmiwin tussnanin d tesnatwilanin d tumḍinin » imi i d-yesnegma yiwen n usnas i yidlisen umḍinen s tmaziɣt yernu yeckeṛ-d arraz-a i yessebɣasen imnadiyen yettmahalen deg unrar n tutlayt d yidles amaziɣ, am wakken i d-yerna dakken arraz-a d win yessebɣasen i usnegmu n yisnasen d imaynuten.
