Tella-d ass-a n Lexmis 01 n furar 2024 Tirza n Uselway n Tesbeddit Amidul, Mass Ahmed Nouh, ɣer Usqamu Unnig n Timmuzɣa, anda t-yemmuger umaray amatu , Mass Si El Hachemi ASSAD.

Di temlilit-a iḥedren yikataren n usqamu Unnig n Timmuzɣa akked wid n Tesbeddit «Amidul », awal yezzi ɣef warraz agraɣlan « Energy Globe » i d-tessas tesbeddit Amidul di tmurt n Nurwiǧ, ɣef usenfar-ines di Tɣardayt "taɣremt  Tafilelt "  yeddan d twennaḍt.  Arraz-a amezwaru tḥerra-t-id Tesbeddit Amidul deg yiwen umyezwer agraɣlan gar ugar n 2000 isenfaren n 180 tmura n umaḍal, d ayen a yernun ccan i tmurt-nneɣ, ad tzux yis deg umaḍal.

Timilit-a dɣa tella d tegnit i sin yimasayen ad mmeslayen ɣef wazal sɛan isenfaren yettqadren tawennaḍt d unegmu imezgi, imi d wid irefden imenzayen-nneɣ idelsanen, anect-a d ayen iɣef yeqdec usqamu unnig n timmuzɣa deg waṭas n temliliyin-is.