Mass Si El Hachemi Assad,

Imḍebber n Usqamu Unnig n Timmuzɣa - HCA,

Massa Aïcha Barki,

Taselwayt n tiddukla tazzayrit IQRAA,

Imḍebbren n temdint n Bgayet,

Timeddukal, imeddukal, azul fell-awen.

S lferḥ d ameqqran I d-nerza ɣer Bgayet akken ad nettekki di tmeɣra-agi n uselmed n tmaziɣt. Tumert-nneɣ ladɣa terna imi yemlal wesfugul n unaẓur-nneɣ ameqqran Lounès Matoub akk d wesfugel n uselmed n tmaziɣt, imi asalas, ɣef tmaziɣt I isebbel leɛmer-is. Nefreḥ nezzeh asmi I d-ilul usenfar-agi, nedda deg webrid-is. Di Wehran, aṭas inelmaden I d-yerzan ad lemden: d imɣaren, d ilmeẓyen, d Leqbayel neɣ d imsaɛraben, ɣran neɣ ur ɣrin : Lemden tamaziɣt, ṭṭfen armi d ass aneggaru, ɣas deg waṭas tikwal mačči d tamsalt fessusen. Aṭas I yessaramen ad ɣren, nessaram ad ilin ttawilat ugar akka d asawen di Wehran. Ayen yessefraḥen ugar d azal I yefka Useqqamu Unnig n Timmuzɣa I uselmed n tmaziɣt, imi aselmed d llasas n useḥbiber ɣef tmaziɣt d wesnerni-ines. “Win yebɣan tamaziɣt, ad yissin tira-s”, yeqqim deg waṭas tegnatin d awal kan, s usenfar-agi, tessulfem- as ad yezger ugar ɣer tigawt. Nessaram d win ara idumen, d win ara yennernin, ara yimɣuren, acku, asnerni d useḥbiber ɣef tmaziɣt fell-as I bnan. Yegra-yaɣ-d kan ad nerr tajmilt u ad nesnemmer kra n tin d win yettekkan I wakken asenfar-agi ad iwali tafat u ad yelḥu ar zdat. Azul I Mass Imdebber n Useqqamu Unnig n Timmuzɣa yessḥerṣen nezzeh I wakken ad yenjer webrid I uselmed n tmaziɣt, imi d wagi I d abrid yessawaḍen.

Bessai Houari

Aselmad n tmaziɣt, Aɣerbaz Abane Remdane, Wehran

ass n 20 seg yunyu 2016