SKIKDA – Ad d-yili yiwen n Usarag Agraɣlan ɣef Ugellid Anumidi Sifaks (202-250 uqbel Sidna Ɛisa) deg Ctembeṛ deg Ɛin Timucent, ɣef wakken ay d-yenna, ass n usamas (lḥedd) deg Skikda, umaru amatu n Useqqamu Unnig i Timmuzɣa, Si El Hachemi Assad. Ad d-yili Usarag-a s usentel n « Tagelda n Yimasisilen (Numidya Tutrimt), Sifaks d umtawa n Siga (202 uqbel Sidna Ɛisa », yernu d win aydeg ara d-mlilen yimnadiyen isdawanen iɣelnawen d yiwerdaniyen akken ad skasin ɣef umezruy d yigaluzen n Numidya Tutrimt ddaw tgelda n Sifaks, ɣef wakken ay d-yenna Mass Assad deg tesɣimt n tmehla n ussileɣ amsadur deg yijifeṛ n terzi-nnes n sin n wussan ɣef twilayt n Skikda. Ad d-yili umyager-a d talemmiẓt i usduqqes n unadi deg temnaḍt-a d uheyyi n tecrawt ɣef yimahilen iqburen d yitraren ay d-yellan ɣef temdinin n tgelda-a, ɣef wakken ay d-yenna Mass Assad ay d-yessumren daɣ i uselway n tɣiwant n Skikda ad yessers asebdad ara yilin d tajmilt i Yugurten, am usebdad-nni ara ssersen deg Lezzayer Tamaneɣt d tajmilt i Masensen deg wayyuren ay d-yetteddun. Ixebber-d umaru amatu n Useqqamu Unnig i Timmuzɣa, ass n usidyas (ssebt) dakken caren-d uḍḍun azegzaw n 1066 i usmatu n usseqdec n tutlayt tamaziɣt deg yijifeṛ n yiwen n usarag ɣef « Tmaziɣt deg Lezzayer » ay d-yellan deg Ugemmiw n Yidles n Skikda i lmend n usfugel n umulli wis 23 n ussebded n Useqqamu Unnig i Timmuzɣa.