S leḥzen d ameqqran i imuger Usqamu Unnig n Timmuzɣa tanezzayt n wass-a isali n tmettant n Mulay Seddiq Sliman, argaz n yidles d tmusni. Tasudut-nneɣ terra-yas tajmilt aṭas n tikkal di tudert-is, ladɣa di l'Opéra n Lezzayer ilmend n tmeɣra n taggara n usfuggel n umulli wis 100 n tlalit n Mulud at Mεemmer. Ccan-is ɣur-nneɣ meqqer ilmend n leqdic-is deg unnar n yidles amaziɣ d wafud i d-yefka asmi yella d amnir agejdan i iqedcen d Mulud at Mεemmer deg unẓul n tmurt ladɣa di Timimun tamnaḍt ideg d-yekker. Mulay Seddiq Sliman umi sawalen daɣen Mulay Timi, netta d ameɣnas yesseḥbabren ɣef tzennatit yellan d yiwet seg tsenfal n tmaziɣt.